सोसायटीच्या सामाईक जागेवरील सभासदांचे अतिक्रमण कारवाईस पात्र: ॲड. रोहित एरंडे. ©
सर, आमच्या सोसायटी मध्ये काही सभासदांनी फ्लॅट बाहेरील मोकळी जागा (कॉरिडॉर) ग्रील लावून बंदिस्त केली आहे, तर काही लोकांनी कुंड्या ठेवून जागा अडवली आहे. तसेच काही सभासदांनी त्यांच्या खिडकीच्या बाहेर शेड /ऑनिंग उभारल्यामुळे वरच्या फ्लॅट धारकांचा "View " ला अडथळा होत आहे. अश्या प्रकारांमध्ये काय कारवाई करता येईल ?
कमिटी सभासद , पुणे.
उत्तर : आपल्याला जेवढी जागा करारनाम्याने मिळाली आहे तेवढीच जागा वापरण्याचा अधिकार सभासदाला असतो. मोकळा पॅसेजला ग्रील लावणे आणि झाडाची जागा वापरणे असे प्रकार सर्रास बघायला मिळतात आणि कायद्याच्या भाषेत ह्याला अतिक्रमण (एन्क्रोचमेंट) असे म्हणता येईल. या संदर्भात आदर्श उपविधी १६९ (अ) मध्ये स्पष्ट तरतुदी केल्याचे आढळून येईल. ह्या तरतुदीप्रमाणे जिना, पायऱ्या, लँडिंग एरिया, सामायिक पार्किंग स्पेस, कॉरिडॉर आणि अश्या प्रकारच्या इतर सर्व मोकळ्या /सामायिक जागा ह्या सर्व सभासदांच्या वापराकरिता असतात आणि त्यामुळे कोणत्याही एका सभासदाला त्यावर हक्क सांगता येणार नाही आणि कोणताही सभासद हा अश्या जागा स्वतःच्या वापराकरिता बळकावू शकत नाही. ह्या सर्व जागांचा उपयोग हा त्या जागा ज्या कारणाकरिता दिल्या आहेत त्याच करता झाला पाहिजे असेही पुढे नमूद केले आहे. ज्या सभासदाने अश्या प्रकारचे अतिक्रमण केले असेल ते त्यांनी त्वरित काढून घेणे गरजेचे आहे आणि अश्या सभासदाने जितका काळ अश्या जागांवर अतिक्रमण केले असेल तेवढ्या कालावधी करता मासिक देखभाल खर्चाच्या पाचपट इतकी रक्कम देणे बंधनकारक राहील.
त्याचप्रमाणे कुठल्याही सभासदाला सोसायटीच्या आणि महानगर पालिकेच्या परवानगीशिवाय मंजूर नकाशाच्या बाहेर जाऊन कुठल्याही प्रकारचे बांधकाम, रचनात्मक (स्ट्रक्चरल ) बदल करता येत नाहीत, हि महत्वाची तरतूद पुढे दिली आहे. त्याचप्रमाणे उपविधी ४८(अ) देखील कुठल्याही सभासदाला आपले वर्तन किंवा कृत्य हे इतर सभासदांना उपद्रवकारक आणि त्रासदायक ठरेल असे होणार नाही ह्याची काळजी घेणे बंधनकारक आहे आणि अश्या वर्तनाविरुद्ध कमिटीला स्वतःहून किंवा तक्रार अर्ज आल्यास कारवाई करण्याचे अधिकार आहेत. असे वर्तन हे उपविधी ४९ अन्वये सभासदत्व रद्द होण्याचे कारण ठरू शकते, हेही लक्षात ठेवावे. त्यामुळे आपण संबंधित सभासदांना लेखी नोटीस देऊन असे वर्तन ताबडतोब थांबवायला सांगावे. त्यातून काही निष्पन्न झाले नाही तर अश्या सर्व गोष्टींच्या फोटो. इ. पुराव्यांसह सक्षम न्यायालयात असे अतिक्रमण काढण्यासाठी तुम्हाला केस दाखल करावी लागेल. तसेच मंजूर नकाशाच्या विपरीत बांधकामासंदर्भात महानगर पालिकेकडे देखील तक्रार करता येईल.
ऍड. रोहित एरंडे. ©
.
Comments
Post a Comment